Tutón nastawk budźe wam pomhać, symbolowe lajsty třećich poskićowarjow kaž Ask, searchqu, MyStart, incredibar, seeearch, somoto, sweetim, uTorrent a druhich z Firefox wotstronić a waše standardne nastajenja za startowu stronu, stronu noweho rajtarka a pytanje wobnowić. Zo byšće symbolowu lajstu Babylon wotstronił, hlejće nastawk How to remove the Babylon toolbar, home page and search engine.

• Jeli prosće chceće pytawu z pytanskeho pola Firefox wotstronić, hlejće nastawk Pytawu w Firefox přidać abo wotstronić.
• Jeli pomoc za přiměrjenje symbolowych lajstow trjebaće, abo jeli prosće chceće symbolowu lajstu schować, hlejće Wodźenske elementy, tłóčatka a symbolowe lajsty w Firefox přiměrić.

Kak je so to stało?

Symbolowe lajsty wot třećich poskićowarjow softwary móža waše nastajenja za pytanje, za stronu noweho rajtarka a startowu strona změnić a druhe problemy z Firefox zawinować. Tute symbolowe lajsty móža so přidać, hdyž websydło wopytujeće a na wotkaz „Instalować“ kliknjeće, hdyž instalowanski program za symbolowe lajsty sćahujeće a wuwjedźeće a hdyž softwaru instalujeće, kotraž symbolowu lajstu za Firefox wobsahuje. Budźće kedźbliwy, hdyž druhe nałoženja instalujeće a aktualizujeće a wotzwolće wšě poskitki za symbolowe lajsty abo druhu njewitanu sobudodatu softwaru.

Někotři softwarowi poskićowarjo poskićeja tež swójsku wersiju Firefox, kotraž symbolowu lajstu a druhe přiměrjenja wobsahuje (na přikład Mozilla Firefox® optiměrowany za Yahoo!); sćehńće tuž Firefox přeco ze sćehnjenskeje strony zhotowjerja.

Kak móžu to porjedźić?

Zrjadowak přidatkow za wotstronjenje symboloweje lajsty wužiwać

Zwjetša móžeće symbolowe lajsty takle ze zrjadowaka přidatkow wotinstalować:

1. Klikńće na menijowe tłóčatko , potom na Přidatki a drasty a wubjerće Rozšěrjenja.
2. Wubjerće symbolowu lajstu, kotruž chceće wotstronić.
3. Klikńće na tłóčatko Wotstronić.
4. Klikńće na Znowa startować, hdyž so jewi. Waše rajtarki budu so po nowym starće składować a wobnowjeć.

Jeli njemóžeće symbolowu lajstu ze zrjadowaka přidatkow wotstronić, wužijće móžnosć „Znjemóžnić“ jako nuzowe rozrisanje abo čitajće nastawk Cannot remove an add-on (extension or theme), zo byšće druhe rozrisanja namakał.

Standardne nastajenja za startowu stronu abo pytanje wobnowić

Snano dyrbiće swoje pytanske nastajenja wróćo stajić a standardnu stronu noweho rajtarka, startowu stronu a pytawu wobnowić, po tym zo sće symbolowu lajstu wotstronił. Za dalše informacije hlejće nastawki Standardne pytanske nastajenja w Firefox změnić, Wo stronje noweho rajtarka a Startowu stronu postajić.

Druhe rozrisanja

• Jeli je so waša instalacija Firefox wot druheho softwaroweho poskićowarja přiměriła, dyrbiće Firefox ze swojeho ličaka wotinstalować a sćehńće potom Firefox ze sćehnjenskeje strony zhotowjerja a instalujće jón znowa.
• Jeli so njewitana symbolowa lajsta, startowa strona a pytawa po znowastartowanju Firefox zaso jewja, sće snano złowólnu softwaru na swojim ličaku instalował. Hlejće Problemy Firefox rozrisać, kotrež so přez škódne programy zawinuja.