Toś ten nastawk buźo wam pomagaś, symbolowe rědki tśeśich póbitowarjow ako Ask, searchqu, MyStart, incredibar, seeearch, somoto, sweetim, uTorrent a drugich z Firefox wótpóraś a waše standardne nastajenja za startowy bok, bok nowego rejtarka a pytanje wótnowiś. Aby symbolowu rědku Babylon wótpórał, glejśo nastawk How to remove the Babylon toolbar, home page and search engine.

• Jolic cośo jadnorje pytnicu z pytańskego póla Firefox wótpóraś, glejśo nastawk Pytnicu w Firefox pśidaś abo wótwónoźeś.
• Jolic trjebaśo pomoc za pśiměrjenje symbolowych rědkow, abo jolic cośo jadnorje symbolowu rědku schowaś, glejśo Wóźeńske elementy, tłocaški a symbolowe rědki w Firefox pśiměriś.

Kak jo se to stało?

Symbolowe rědki wót tśeśich póbitowarjow softwary mógu waše nastajenja za pytanje, za bok nowego rejtarka a startowy bok změniś a druge problemy z Firefox zawinowaś. Toś te symbolowe rědki mógu se pśidaś, gaž woglědujośo se k websedłoju a kliknjośo na wótkaz „Instalěrowaś“, gaž ześěgujośo a wuwjedujośo instalěrowański program za symbolowe rědki a gaž instalěrujośo softwaru, kótaraž wopśimujo symbolowu rědku za Firefox. Buźćo wobglědniwy, gaž instalěrujośo a aktualizěrujośo druge nałoženja a wótwólśo wšykne póbitowanja za symbolowe rědki abo drugu njewitanu pśidanu softwaru.

Někotare softwarowe póbitowarje póbituju teke swójsku wersiju Firefox, kótaraž wopśimujo symbolowu rědku a druge pśiměrjenja (na pśikład Mozilla Firefox® optiměrowany za Yahoo!); ześěgniśo pótakem Firefox pśecej ze ześěgnjénskego boka zgótowarja.

Kak mógu to pórěźiś?

Zastojnik dodankow za wópóranje symboloweje rědki wužywaś

Zwětšego móžośo symbolowe rědki tak ze zastojnika dodankow wótinstalěrowaś:

1. Klikniśo na menijowy tłocašk pótom na Dodanki a drastwy a wubjeŕśo Rozšyrjenja.
2. Wubjeŕśo symbolowu rědku, kótaruž cośo wótpóraś.
3. Klikniśo na tłocašk Wótpóraś.
4. Klikniśo na Znowego startowaś, gaž se pokazujo. Waše rejtarki budu se pó nowem starśe składowaś a wótnowjaś.

Jolic njamóžośo symbolowu rědku ze zastojnika dodankow wótpóraś, wužyjśo móžnosć „Znjemóžniś“ ako nuzowe rozwězanje abo cytajśo nastawk Cannot remove an add-on (extension or theme), aby druge rozwězanja namakał.

Standardne nastajenja za startowy bok abo pytanje wótnowiś

Snaź musyśo swóje pytańske nastajenja slědk stajiś a standardny bok nowego rejtarka, startowy bok a pytnicu wótnowiś, za tym až sćo symbolowu rědku wótpórał. Za dalšne nastawki glejśo Standardne pytańske nastajenja w Firefox změniś, Wó kachlickach na boku „Nowy rejtarik“ a Startowy bok póstajiś.

Druge rozwězanja

• Jolic jo se waša instalacija Firefox wót drugego softwarowego póbitowarja pśiměriła, musyśo Firefox ze swójogo licadła wótinstalěrowaś a ześěgniśo pótom Firefox ze ześěgnjeńskego boka zgótowarja a instalěrujśo jen znowego.
• Jolic njewitana symbolowa rědka, njewitany startowy bok a njewitana pytnica pokazuju se zasej pó znowegostartowanju Firefox, sćo snaź złosnu softwaru na swójom licadle zainstalěrował. Glejśo Problemy Firefox rozwězaś, kótarež zawinuju se pśez škódne programy.