Toś ten nastawk pódrobne zapokazanje do nejzajmnjejšych nowych funkcijow, pólěpšenjow a změnow bitujo, kótarež wužywarje w Thunderbird 91.0 wiźe. Wobšyrnjejša, ale mjenjej wopisujuca lisćina změnow, móžośo we wersijowych informacijach Thunderbird 91 namakaś.

Wobstarajśo se Thunderbird w swójej rěcy! Witaj letišćina!

Thunderbird 91 jo we wjele rozdźělnych rěcach na startowem boku Thunderbird k dispoziciji a jo se pśełožył wót zgromaźeństwa. Eksistujuce instalacije Thunderbird se w danem casu awtomatiski aktualizěruju. Nowy: Witaj letišćina ako slědna pśidana rěc!

Prědne kšace z Thunderbird su lažke!

Njejo nigdy było lažčej, wašu eksistěrujucu e-mailowu adresu z Thunderbird konfigurěrowaś. Nowy: Smy zlěpšyli wašo dožywjenje zaźěłanja a smy wólažcyli zwězowanje z eksistěrujucymi kalendarjami a adresnikami online (glejśo dołojce). Konto se něnto w rejtariku konfigurěrujo. Zapódajśo jadnorje swójo mě, swóju e-mailowu adresu a swójo gronidło a zwěžćo ned!

Jadnorje z wašymi eksistěrujucymi adresnikami online a kalendarjami zwězaś: Pódpěra CardDAV a CalDAV a awtomatiske namakanje pśidane

Cyńśo Thunderbird k swójomu wósobinskemu informaciskemu zastojnikoju! Thunderbird z integrěrowanym kalendarjom, z adresnikom a chatmodulami pśiźo.

Nowy: Thunderbird něnto internetne adresniki CardDAV a kalendarje CalDAV pódpěra. Za tym až sćo konfigurěrował swóju eksistěrujucu e-mailowu adresu z pśigódneju awtomatiskeju konfiguraciju, Thunderbird na zakłaźe pódanych wužywaŕskich informacijow waše internetne adresniki a kalendarje awtomatiski wótekšywa.

Gaž Thunderbird konto Google mail pśidawaśo, móžośo swóje eksistěrujuce kalendarje a adresnik Google pśidaś (glejśo pśipiski).

Kontrolěrujśo swójo e-mailowe dožywjenje: waše konta, waš pórěd!

Pokažćo wšykne swóje e-mailowe konta w jadnučkem, pśeglědnem a wjelebocnem nałoženju. Žedno wabjenje, žedno slědowanje.

Nowy: Něnto móžośo lažko pórěd změniś, pó kótaremž se waše konta we wobceŕku zarědnikow pokazuju:

• Wubjeŕśo ≡ > Kontowe nastajenja, śěgniśo pón zapiski głownego konta do póžedaneje pozicije.
• Abo wubjeŕśo zapisk głownego konta a tłocćo Alt + ↓ abo Alt + ↑, aby pórěd kontow z pomocu tastatury změnił.

Mějśo swóje nejlubše póglědy do e-maile pó swójom dobrozdaśu!

Thunderbird wam zmóžnja wubraś, kak cośo swóje e-mailowe powěsći wót někotarych e-mailowych adresow pokazaś. Nowy: Móžośo něnto někotare štaplowane naglědy w swójom wobceŕku zarědnikow měś a je tak zastojaś, ako cośo - Stajśo swóje nejlubše na zachopjeńk! How su někotare móžnosći:

• Wšykne zarědniki - Pokažćo kužde e-mailowe konto separatnje z jogo originalneju zarědnikoweju strukturu.
• Zjadnośone zarědniki - kombiněrowany naglěd wšych wašych e-mailowych adresow, z globalnym dochadom posta, zarědnikom Pósłane atd.
• Nejlubše zarědniki - Wy maśo wólbu! Klikniśo z pšaweju tastu na někaki zarědnik, wubjeŕśo pón zapisk Preferěrowany zarědnik z kontekstowego menija, aby swójim faworitam zarědnik pśidał.

Aby naglědy wubrał, kótarež cośo k swójomu wobceŕkoju zarědnikow pśipěś:

• Wubjeŕśo tłocašk Nastajenja wobceŕka zarědnikow ⋯ z rědki wobceŕka zarědnikow a zmóžniśo swóje preferěrowane naglědy. Móžośo teke ≡ > Naglěd > Zarědniki wužywaś.
• Aby swóje naglědy sortěrował, znjemóžniśo wšykne a wubjeŕśo pón te, kótarež cośo w nawopacnem pórěźe pokazaś: Kuždy slědny wubrany naglěd buźo waš prědny naglěd.
• Móžośo pśecej swóje wuběrki změniś abo je pśetwóriś …

Natiwna pódpěra za rědy macOS, kótarež su se wuwili z Apple Silicon

Thunderbird jo za Windows, Linux a MacOS k dispoziciji. Nowy: Natiwna pódpěra platformy za rědy macOS, kótarež su se wuwili z CPU Apple Silicon, wjelike wugbaśowe pólěpšenja sobu pśinjeso.

Eficienca, źož ju nejwěcej trjebaśo: Pólěpšony adresěrowański wobceŕk za nowe powěsći

Thunderbird jo za to myslony, zastojanje wašych mejlkow wólažcyś a eficientnjejše cynił. Wěmy, až rozdźělne wužywarje rozdźělne pótrjebnosći maju. Mjaztym až e-mail lažku a za kuždego pśistupnu cynimy, póbitujomy teke eficiencu za pśedewześa a rozšyrjone funkcije. Gaž nowu powěsć pišośo, wopytajśo toś te nowe a pólěpšone funkcije w adresěrowańskem wobceŕku:

Priwatnosć a šćit datow lažko cynjone: Nowe zdźělenje wó zjawnej masowej e-maili

Nowy: Thunderbird buźo něnto nutśikownu powěźeńku dołojce we wojnje Pisaś pokazowaś, gaž adresowemu pólu Komu abo Kopija 15 abo wěcej zjawnych dostawarjow pśidawaśo. Gaž wjele zjawnym dostawarjam powěsć sćelośo, móžo se to pśeśiwo jich priwatnosći abo pšawam šcita datow pśejś.

• Powěźeńka staja pśigódny akciski tłocašk k dispoziciji, Schowanu kopiju město togo wužywaś, kótaryž awtomatiski wšykne zjawne dostawarje do adresowego póla Schowana kopija pśesunjo, aby se wobinuło, až se drugim dostawarjam jich e-mailowe adrese pokazuju.
• Móžośo granicnu gódnotu ze schowanym nastajenim změniś: mail.compose.warn_public_recipients.threshold

Nowy wužywaŕski pówjerch za pśidawanje pśidankow

• Nowy: Pśidawanje pśidankow pśez śěgnjenje a pušćenje jo něnto lažčejše, dokulaž móžośo je něźi w cełem woknje Pisaś pušćiś. Za wobraze móžośo wubraś, lěc se maju do wašogo powěsćowego teksta zasajźiś abo ako normalne pśidanki pśidaś.

• Nowy: Wobćeŕk pśidankow jo se wótwónoźeł z adresowego wobceŕka a dołoj pśesunuł, což widobnu konsistencu z tym wobchowajo, kak pśidanki nalicyjomy, gaž se powěsć cyta.

• Nowy: Dajo nowa mjazynarodna tastowa skrotconka za pśistup k njeproznemu wobceŕkoju pśidanka a aby se njeprozny wobceŕk pśidankow pokazał abo schował: Strg/Cmd+⇧+M.
• Njezabywajśo, dajo teke Strg/Cmd+⇧+A, aby se datajowe pśidanki pśidali.
• Sćo wěźeł, až móžośo swóje pśidanki pśerědowaś, za tym až sćo je pśidał? Gaž dwa pśidanka maśo, abo wěcej, wubjeŕśo jaden pśidank abo wěcej, aby pśesunuli, klikniśo z pšaweju tastu na jaden z nich, a wubjeŕśo akcije z wokna Pśidanki pśerědowaś. Móžośo teke pśidanki pó jich datajowych mjenjach alfabetiski sortěrowaś. Mimo togo tastowe skrotconki teke funkcioněruju, gaž akciske wokno jo zacynjone!

Nowy tłocašk Tekstowy stil wótwónoźeś a zaktualizěrowane symbole na formatěrowańskej rědce

• Pólěpšony: Dajo něnto tłocašk za wótwónoźowanje kuždego tekstowego formatěrowanje z wubranego teksta we woknje Pisaś. Móžośo toś ten tłocašk wužywaś, aby tekstowe formaty ako tucny, kursiwny, pódšmarnjony, pismowu barwu, pismowu wjelikosć atd. wótwónoźeł. Jolic njejo wuběrk, se wšykne tekstowe formaty wót pozicije kursora sem njewužywaju. Tastowa skrotconka za toś ten pśikaz jo Strg/Cmd+⇧+Y.
• Wšykne symbole tekstowego formatěrowanja na formatěrowańskej rědce su se zaktualizěrowali, aby se lěpjej rozeznawali a se togodla lažčej spomnjeli.

Nowa akcija Wobwjasć za direktne pśipósłanje powěsći

Nowy: Móžośo powěsć tak dalej pósrědniś ako wóna jo, ale z originalnym wótpósłarjom, kótarež jo w adresowem pólu Wótegroniś pśednastajony. Toś ta funkcija móžo za malsne dalejpósrědnjenje w pśedewześach abo běrowach wužytna byś, na pś. wót sekretarki do šefa. Wopśimjeśe originalneje powěsći tak wóstanjo ako jo, ale wótegrona na wobwjeźonu powěsć se awtomatiski originalnemu wótpósłarjeju pśipósćelu.

• Klikniśo z pšaweju tastu na jadnotliwu powěsć w lisćinje powěsćow a wubjeŕśo pón Wobwjesć z kontekstowego menija.
• Dajo teke tłocašk ↠ Wobwjasć, kótaryž jo z wokna Pśiměriś k dispoziciji:
  

Klikniśo z pšaweju tastu na e-mailowu symbolowu rědku, wubjeŕśo pón Pśiměriś… a śěgniśo tłocašk do póžedaneje pozicije na symbolowej rědce.

Wužytk bźez cajka: Nowy integrěrowany PDF-cytak

Nowy: Rowno tak ako Firefox Thunderbird integrěrowany PDF-cytak ma. Tak móžośo jadnorje pśipowjesone PDF-dataje w rejtariku wócyniś, bźez togo aby eksterne nałoženje wužywał.

Nowy śišćaŕski dialog z integrěrowanym pśeglědom a nastajenjami

Pólěpšony: Śišćanje jo se pólěpšyło: Nowy śišćaŕski dialog, kótaryž jo se zderbnuł wót platformy Mozilla, śišćanje, śišćaŕski pśeglěd a śišćaŕske nastajenja w jadnučkem, zjadnorjonem wužywaŕskem pówjerchu kombiněrujo. Abo móžośo hyšći śišćaŕski dialog swójogo systema wužywaś, jolic to preferěrujośo.

Drastwy, kótarež se spódobaju: Wubjeŕśo swóje barwy!

Thunderbird tśi barwne drastwy sobu pśinjaso:

• Systemowu drastwu (standard - wóna barwy wašogo źěłowego systema wužywa)
• Swětłu drastwu (na swětłem boku)
• Śamnu drastwu (w nocy wócy šonujucu)

Wopytajśo ju! Móžośo swóju drastwu z mało kliknjenjami změniś a změny se ned wustatkuju:

≡ > Dodanki a drastwy > Drastwy, wubjeŕśo pón Zmóžniś za drastw swójeje wólby.

Pólěpšony: Wjele pólěpšenjow a pórěźenjow śamnej drastwje, kótaraž se něnto na skóro kuždy źěl nałoženja wustatkujo.

Póstajśo gustosć wužywaŕskego pówjercha Thunderbird

Nowy: Gustosć wužywaŕskego pówjercha Thunderbird dajo se něnto z tśimi modusami z wóteběrajuceju gustosću wóźiś: Kompaktny, Normalny, Touch. Dobra nowosć za te, kótarež z touchrědami źěłaju!

≡ > Naglěd > Gustosć > Kompaktny | Normalny | Touch

Engelske zapśimjeśe Options jo se pśemjeniło pód Windows dla źěłowy system pśesegujuceje konsistency do Preferences

Thunderbird na wjele platformach wjelicnje funkcioněrujo: Windows, Linux a MacOS. Za Thunderbird na Windows smy pśemjenili engelske zapśimjeśe menija Options do Preferences, aby menijowa sćažka za konfigurěrowanje Thunderbird ta samska na wšych platformach była:

≡ > Nastajenja

OpenPGP: Słanje skoděrowanych powěsćow na dostawarje schowanych kopijow něnto z warnowanim móžne

Pólěpšony: Móžośo něnto dostawarjam schowaneje kopije z OpenPGP skoděrowane powěsći pósłaś. Thunderbird wam warnowanje pokažo, až to buźo indirektnje waše dostawarje schowaneje kopije pokazowaś. Za wěste scenarije ako na pśikład słanje schowaneje kopije na sebje, mogło riziko pokazowanja akceptěrujobne.

OpenPGP: Nowe akcije za kopěrowanje ID klucow a palcowych wótśišćow

Thunderbird integrěrowany zastojnik klucow OpenPGP za wšykne waše kluce sobu pśinjaso. Nowy: Akcije za kopěrowanje klucowych ID a palcowych wótśišćow su se pśidali kontekstowemu menijeju.

• ≡ > Rědy > Zastojnik OpenPGP-klucow
• Klikniśo z pšaweju tastu na eksistěrujucy kluc > Kopěrowaś
• Wubjeŕśo z pódmenija Kopěrowaś mjazy Palcowy wótśišć, ID kluca a Zjawny kluc.

OpenPGP: Nowe rozšyrjone nastajenja

Thunderbird zatwarjone koděrowanje pśez OpenPGP abo S/MIME bitujo. Nowy: Něnto móžośo zaźaržanje koděrowanja z tśimi nastajenjami zgłosowaś, kótarež su se pśidali abo pokazali. Respektěrujomy, až rozdźělne wužywarje rozdźělne pótrjebnosći maju. Jolic koděrowanje njejo zarědowane, se rozšyrjone nastajenja njewužywaju a su togodla znjemóžnjone. Někotare z toś tych nastajenjow měli se z glědanim wužywaś, až njeby se waša priwatnosć wobgrozyła.

≡ > Kontowe nastajenja > Wašo konto > Koděrowanje kóńc do kóńca > Rozšyrjone nastajenja

Kalendaŕ: Nowe zdźěleńske nastajenja za jadnotliwy kalendaŕ a globalne zdźěleńske nastajenja

Nowy: Mimo dopominanjow móžośo mjenjej šarowatych wuskokujucych powěźeńkow za kuždy kalendaŕ a globalnje konfigurěrowaś.

• Klikniśo z pšaweju tastu na kalendaŕ we wobceŕku kalendarjow a wubjeŕśo Kakosći.
• Klikniśo na tłocašk ＋ Powěźeńku pśidaś a pódajśo drobnostki powěźeńki.
• Wobkšuśćo dialog kakosćow z tłocaškom W pórěźe.
• Abo móžośo tłocašk Globalne nastajenja powěźeńkow… wužywaś, aby powěźeńki za wšykne kalendarje definěrował.

Kalendaŕ a nadawki: Akciji „anulěrowaś“ a „wóspjetowaś“ za tšojenja a nadawki pśidanej

Nowy: Za tym až sćo napórał abo wulašował nadawki abo tšojenja, móžośo toś te akcije něnto anulěrowaś abo wóspjetowaś.

• Strg/Cmd + Z: Anulěrowaś
• Strg/Cmd + Y: Wóspjetowaś

Chat: Standardny serwer za nowe chatkonto jo se změnił do libera.chat

Nowy: Wjaselimy se, libera.chat ako nowy standardny serwer za nowe chatkonta póbitowaś. Twórje se njedawno wót něgajšnego teama freenode a bitujo wabjecu platformu zgromaźeństwa za dermotnu softwaru wótwórjonego žrědła ako teke projektow, kótarež se wót peera nawjeduju. Libera Chat jo dermotny a wuwija se wót dobrowólnych z cełego swěta. Chattujmy!

Chat: Wobrazowe emotikony su se narownali pśez znamuška Unicode

Pólěpšony: Gaž cośo se z emotikonami zwurazniś, Thunderbird něnto znamuška Unicode město małych wobrazkow wužywa. Jadnorje lěpše!

Chat: Pórěźenja a pólěpšenja pód hawbu

Pórěźony: Licba małych problemow jo se pórěźili, a smy pśewjadli někotare wažne změny pód hawbu, aby radme chatdožywjenje měł.

• Chowanje systemowych powěźeńkow něnto zasej funkcioněrujo, aby mógał na swóju konwersaciju bźez wótchylenja koncentrěrowaś.
• Chatkontowe nastajenja se něnto korektnje składuju.

FileLink: Pódpěra WeTransfer jo se wótwónoźeła, ale móžośo hyšći wjelike pśidanki pó mroku słaś

Wjele e-mailowych serwerow powěsći z wjelikimi datajowymi pśidankami njeakceptěrujo. Z funkciju Filelink Thunderbird móžośo wjelike pśidanki do mroka nagraś a wótkaz pósłaś, mesto togo aby je direktnje k swójej e-mailowej powěsći pśipowjesył. Thunderbird dalej pódpěru za wšake druge póbitowarje z dodankami póbitowarjow FileLink póbitujo. Aby toś tu funkciju wužywał, musyśo jaden z toś tych dodankow instalěrowaś:

• ≡ > Nastajenja > Pisaś > Pśidanki > Dalšne póbitowarje namakaś…
• Wubjeŕśo dodank póbitowarja Filelink a klikniśo na ＋ K Thunderbird pśidaś.
• Wobkšuśćo dodankowe pšawa z wuskokujucego wokna z Pśidaś.
• Klikniśo we wótrězku Pśidanki nastajenjow (glejśo górjejce) a pón na [Wašogo póbitowarja pśidaś].
• Pśidajśo informacije, kótarež se dodank pomina.
• Thunderbird naraźujo, FileLink za pśidanki wužywaś, kótarež su wětše ako 5 MB (móžośo limit w samskem wótrězku změniś), abo móžośo z pšaweju tastu na normalny pśidanki kliknuś, aby jen konwertěrował.

Pódpěra za movemail jo se wótwónoźeła

Pódpěra za movemail jo se wótwónoźeła. Pšosym konfigurěrujśo IMAP- abo POP3-konto město togo, aby pśistup k swójej e-maili měł.

≡ > Nowy > Eksistěrujuce e-mailowe konto…