Konfigurěrowanje nowego konta z Thunderbird jo lažke. Wšykno, což musyśo cyniś, jo, swójo wužywaŕske mě a gronidło za swójogo e-mailowego póbitowarja a swóju e-mailowu adresu pódaś. Thunderbird zwiskowe drobnostki (na pśikład porty, serwerowe mjenja, wěstotne protokole atd.) póstaja, gaž swójogo e-mailowego póbitowarja w datowej bance pytaśo, kótaraž zwiskowe informacije za wšykne wažne póbitowarje internetnych słužbow (ISP) wopśimujo. Za tym až jo póbitowarja wašogo konta póstajił (ako jo za symbolom „@“ we wašej e-mailowej adresy pódany), móžo Thunderbird zwětšego kontowe drobnostki k dispoziciji stajiś.

Prědny raz, gaž Thunderbird pó instalaciji wócynjaśo, dostawaśo napominanje profil załožyś. (Zacyńśo w toś tom casowem dypku wokna, kótarež wam konfiguraciju e-mailoweje słužby naraźuju a pókšacujśo). Ako dalšne was pšose, drobnostki wó wašom e-mailowem konśe w slědujucem dialogowem pólu pódaś. Dialogowe pólo se teke pokazujo, gaž nowe e-mailowe konto pśidawaśo (wužywajucy Dataja > Nowy > Eksistěrujuce e-mailowe konto… abo z Kontowe nastajenja). Druga móžnosć, aby se nowe konto pśidało, jo kliknjenje na mě eksistěrujucego konta (pokazana e-mailowa adresa). Pód nadpismom „Konta“ stej dwě nastajeni: „Nastajenja za toś to konto pokazaś“ a „Nowe konto załožyś“„Konto konfigurěrowaś“. Klikniśo pód „Nowe konto załožyś“„Konto konfigurěrowaś“, na „E-mail“, aby slědujuce dialogowe pólo pokazał.

Gaž na Dalej klikaśo, buźo Thunderbird za e-mailowym póbitowarjom pytaś a wopytowaś, serwerowe nastajenja póstajiś.

W paźe górjejce su se wužyli daty póbitowarja, aby kontowe drobnostki zapisowali a słužby konfigurěrowali, kótarež se póbituju:

• Dochadajuca e-mail: IMAP na imap.gmx.net wužiwajo Secure Socket Layer (SSL)
• Wuchadajuca e-mail: SMTP na mail.gmx.net wužywajucy SSL

Maśo móžnosć pak IMAP pak POP ako swój protokol za dochadajucu e-mail wubraś. IMAP a POP stej standardnej protokola za wótwołowanje mejlkow. IMAP, modernjejšy protokol, wam zmóžnja, powěsći na e-mailowem serwerje a na wašom licadle rownocasnje składowaś. Protokol POP jano zmóžnja, powěsći lokalnje składowaś. E-mailowe póbitowarje mógu pśistup pak pśez IMAP-protokol pak POP-protokol póbitowaś, abo pódpěraju wobej protokola. (Aby techniske drobnostki za wobej protokola lěpjej rozměł, glejśo Glossary of Terms including types of Accounts a IMAP-synchronizacija.)

Aby konfiguraciju konta dokóńcył:

• Konto załožyś: Klikniśo na toś ten tłocašk, aby nowe konto załožył.
• Pśetergnuś: Awtomatiska konfiguracija konta se pśetergnjo.
• Manuelna konfiguracija...: Móžośo konto manuelnje konfigurěrowaś. Thunderbird nowe konto z pokazanymi drobnostkami załožyjo a wócynijo dialog Kontowe nastajenja, aby mógł dalšne změny pśewjasć. (Glejśo Manuelna kontowa konfiguracija za pomoc.)

Za tym až sćo załožyłe konto, Thunderbird nowe konto pokažo:

Jolic wašo konto njedajo se awtomatiski pśez Thunderbird konfigurěrowaś, musyśo jo manuelnje konfigurěrowaś. To se w dialogu Kontowe nastajenja stawa, kótaryž w meniju Rědy namakajośo. E-mailowy póbitowaŕ wašogo konta móžo wam drobnostki wó zwiskowych informacijach daś. (Informacije su nejskerjej na jogo websedle k dispoziciji.) Cytajśo nastawk Manuelna kontowa konfiguracija za dopołne instrukcije. Glejśo nastawk FAQ Changing IMAP to POP, jolic musyśo serwer za dochadajucu e-mail wót IMAP do POP pśestajiś.

Nowego ISP pśidaś

Team Thunderbird co serwerowe informacije za tak wjele ISP a webmailowych póbitowarjow ako móžno gromaźiś. Wy móžośo pomagaś! Jolic se informacije wó wašom e-mailowem serwerje njenamakaju, gaž swójo konto załožujośo, musyśo swójo konto manuelnje konfigurěrowaś. Ale, pšosćo pšosym swójogo e-mailowego póbitowarja, aby wón swóje zwiskowe informacije pśipósłał. Za nadrobne techniske informacije wó ISPDB a awtokonfiguraciji, kak móžośo ju wužywaś a jej datowu sajźbu pśidaś, glejśo Autoconfiguration in Thunderbird na MDN web docs.