Jo pśecej wěcej dodankow, kótarež mógu nastajenja wašogo wobglědowaka bźez wašeje dowólnosći změniś abo kšadnu waše daty. Někotare dodanki pśidawaju njewitane symbolowe rědki abo tłocaški, změnjaju waše pytańske nastajenja abo zasmykuju wabjenje wašogo licadła. Firefox něnto pśespytujo, lěc dodanki, kótarež instalěrujośo, su wót Mozilla digitalnje signěrowane. Toś ten nastawk wujasnjujo funkciju signěrowanje dodankow a kak wóna funkcioněrujo.
Zapis wopśimjeśa
Co jo signěrowanje dodankow?
Mozilla pśeglědujo a „signěrujo“ dodanki, kótarež maju se pó wěstotnych směrnicach. Wšykne dodanki, kótarež góspóduju se na addons.mozilla.org toś ten proces pśejdu, aby se signěrowali. Dodanki, kótarež góspoduju se na drugich sedłach, muse se pó tych samskich směrnicach měś, aby je Mozilla signěrował.
Lěcrownož Firefox tuchylu ma system blokěrowańskich lisćinow, jo w pśiběrajucej měrje śěžko, rosćecu licbu złosnych abo njepśespytanych dodankow slědowaś a blokěrowaś. Proces signěrowanja dodankow se pomina, až wuwijarje maju se pó směrnicach wuwijarjow Mozilla. Signěrowanje dodankow w Firefox pomaga, pśed programami šćitaś, kótarež kapruju wobglědowak, a pśed drugimi škódnymi programami z tym, až póśězujo jich instalěrowanje.
Firefox wam instalěrowanje njesigněrowanych dodankow zawoborujo a znjemóžnja njesigněrowane dodanki, kótarež su južo zainstalěrowane.
Kótare typy dodankow muse se signěrowaś?
Rozšyrjenja (dodanki, kótarež pśidawaju Firefox funkcije), rěcne pakśiki a drastwy (dodanki, kótarež wenkowny naglěd Firefox zaměnjaju) muse se signěrowaś. Druge typy dodankow njetrjebaju se signěrowaś.
Źo by ja mógał na njesigněrowane dodanki starcyś?
Dodanki, kótarež póchadaju wót oficielnego sedła dodankow Firefox, pśejdu wěstotne kontrole nježli až se wózjawjaju. Toś te dodanki su pśeglědane a signěrowane. Gaž instalěrujośo dodank wót drugego websedła, pśeglědujo Firefox, lěc dodank jo digitalnje signěrowany, nježli až móžośo jen instalěrowaś.
Co mógu cyniś, jolic Firefox znjemóžnja zainstalěrowany dodank?
Jolic njesigněrowany dodank jo znjemóžnjony, njamóžośo jen wužywaś a zastojnik dodankow pokažo powěźeńku, až dodank njedajo se za wužywanje w Firefox wobkšuśiś a jo se znjemóžnił. Móžośo dodank z Firefox wótwónoźeś a pótom signěrowanu wersiju wót sedła dodankow Mozilla instalěrowaś, jolic taka jo k dispoziciji.
Jolic signěrowana wersija njejo k dispoziciji, stajśo se z wuwijarjom dodanka do zwiska, aby zgónił, lěc wón móžo zaktualizěrowanu a signěrowanu wersiju togo dodanka póbitowaś. Móžośo teke jogo pšosyś, aby swój dodank signěrował (engelski).
Kótare móžnosći mam, jolic cu njesigněrowany dodank wužywaś? (póstupjone wužywarje)
Wersije Firefox Extended Support Release (ESR), Firefox Developer Edition a Nightly wam zmóžnjaju, toś to nastajenje pśepisaś, kótarež signěrowanje rozšyrjenjow wunuźijo. Stajśo nastajenje xpinstall.signatures.required na false w konfiguraciskem editorje Firefox (bok about:config). Aby signěrowańsku nuznosć za rěcne pakśiki pśepisał, stajśo nastajenje extensions.langpacks.signatures.required na false. Daju teke wósebne wersije Firefox bźez marki, kótarež toś to pśepisanje dowóluju. Glejśo nastawk MozillaWiki Add-ons/Extension Signing za dalšne informacije.
